द्रविड, गांगुली यांच्यानंतर आता सचिन तेंडुलकरवरही सोपवली जाणार नवी जबाबदारी?
सचिन तेंडुलकर लवकरच भारतीय क्रिकेटमध्ये महत्त्वाच्या भूमिकेत दिसणार असल्याचे संकेत बीसीसीआयचे अध्यक्ष सौरव गांगुली यांनी दिले आहेत. सचिन स्वत: भारतीय क्रिकेटमध्ये सामील होण्यासाठी काहीतरी मार्ग काढेल, असा विश्वास गांगुलीला वाटतो. भारतीय क्रिकेटला सचिनसारख्या खेळाडूची खूप गरज आहे, असे सौरव गांगुलीचे मत आहे.
मात्र, सचिनला यासाठी पटवणे खूप अवघड आहे कारण तो असा माणूस आहे की ज्याचा कोचिंग किंवा प्रशासन यासारख्या गोष्टींवर फारसा विश्वास नाही. सौरव गांगुलीलाही याची चांगलीच जाणीव आहे. अलीकडेच क्रीडा पत्रकार बोरिया मजुमदार यांना दिलेल्या मुलाखतीत सचिन भारतीय क्रिकेटमध्ये येण्याच्या प्रश्नावर दादा म्हणाला,’सचिन हा नक्कीच वेगळ्या प्रकारचा माणूस आहे. त्याला या सगळ्यात पडायचे नाही. पण मला खात्री आहे की जर सचिन कसा तरी भारतीय क्रिकेटशी जोडला गेला तर आमच्यासाठी यापेक्षा चांगली बातमी असू शकत नाही.
सचिन तेंडुलकरबद्दल बऱ्याच दिवसांपासून अशी चर्चा होती की आता राहुल द्रविड, व्हीव्हीएस लक्ष्मण आणि स्वतः सौरव गांगुली हे भारतीय क्रिकेटमध्ये महत्त्वाचे योगदान देत आहेत. मग सचिन तेंडुलकर कोणत्याही मोठ्या जबाबदारीपासून दूर का आहे.गांगुलीच्या नेतृत्वाखाली खेळलेले राहुल द्रविड आणि व्हीव्हीएस लक्ष्मण हे भारतीय क्रिकेट संघात आधीच महत्त्वाच्या पदांवर आहेत. आता या यादीत सचिन तेंडुलकरचेही नवे नाव असू शकते. मात्र, सचिन तेंडुलकरची टीम इंडियामध्ये कोणत्या भूमिकेसाठी निवड होते, हे पाहावे लागेल.