नाशिक : नाशिक येथील अखिल भारतीय मराठी साहित्य संमेलनात ज्येष्ठ पत्रकार गिरीश कुबेर यांच्यावर शाईफेक करण्यात आली आहे. संभाजी ब्रिगेड यांच्या कार्यकर्त्यांनी याची जबाबदारी घेतली आहे. गिरीश कुबेर यांनी लिहिलेल्या पुस्तकात छत्रपती संभाजी महाराज यांच्याबद्दल अवमानकारक, चुकीची माहिती लिहिल्याबद्दल शाईफेक करण्यात आल्याचे संभाजी ब्रिगेडचे नाशिक जिल्हा सचिव नितीन रोटे पाटील यांनी म्हटले.
रविवारी दुपारी दोन वाजताच्या सुमारास हा प्रकार घडला. साहित्य संमेलनाच्या मुख्य स्टेजच्या मागच्या बाजूला ही घटना घडल्याची माहिती आहे. गिरीश कुबेर यांच्यावर केलेल्या या शाईफेकीनंतर पोलिसांचा बंदोबस्त वाढवण्यात आला आहे. दरम्यान, या सर्व प्रकारावर आता राष्ट्रवादीचे आणि राज्याचे गृहमंत्री दिलीप वळसे-पाटील यांनी प्रतिक्रिया दिली आहे.
‘नाशिकमधील साहित्य संमेलनात लोकसत्ताचे संपादक गिरीश कुबेर यांच्या तोंडाला काळं फासण्याची घटना लोकशाहीवादी पुरोगामी महाराष्ट्रासाठी अस्वस्थ करणारी आहे. निषेध व्यक्त करण्याची ही पद्धत योग्य नव्हे. या घटनेचा योग्य तपास करून संबंधितांवर कारवाई केली जाईल.’ अस वळसे-पाटील म्हणाले आहेत.
नाशिकमधील साहित्य संमेलनात लोकसत्ताचे संपादक गिरीश कुबेर यांच्या तोंडाला काळं फासण्याची घटना लोकशाहीवादी पुरोगामी महाराष्ट्रासाठी अस्वस्थ करणारी आहे. निषेध व्यक्त करण्याची ही पद्धत योग्य नव्हे. या घटनेचा योग्य तपास करून संबंधितांवर कारवाई केली जाईल.
— Dilip Walse Patil (@Dwalsepatil) December 5, 2021
तर, राष्ट्रवादीच्या नेत्या खासदार सुप्रिया सुळे यांनी देखील या प्रकरणावर आपले मत व्यक्त केले आहे. त्या म्हणाल्या, नाशिक येथे अखिल भारतीय मराठी साहित्य संमेलनात लेखक व संपादक गिरीश कुबेर यांच्यावर शाई फेकण्यात आली. साहित्यिक व पत्रकारांवर अशा प्रकारचे हल्ले निषेधार्ह आहेत. या घटनेचा तीव्र निषेध. असं म्हणत सुळे यांनी आपली नाराजी दर्शविली आहे.
