Operation Sindoor : ‘ऑपरेशन सिंदूर’ या आगामी चित्रपटाच्या पोस्टरने सोशल मीडियावर चांगलाच गदारोळ उडवून दिला आहे. ९ मे रोजी शेअर करण्यात आलेल्या या पोस्टरवर काही नेटकऱ्यांनी तीव्र नाराजी व्यक्त केली. अनेकांनी यामध्ये भारतीय सैन्याच्या कारवाईचा संदर्भ असताना त्याचा सादरीकरण चुकीच्या पद्धतीने केल्याचा आरोप केला. या टीकांनंतर चित्रपटाचे दिग्दर्शक उत्तम माहेश्वरी यांनी थेट सोशल मीडियावर माफी मागितली आणि आपला हेतू चुकीचा नव्हता, असा खुलासाही केला.
‘ऑपरेशन सिंदूर’ चित्रपटाची निर्मिती विकी भगनानी फिल्म्स आणि द कंटेंट इंजिनिअर करत असून, या चित्रपटात भारतीय सैन्याच्या पराक्रमाची कहाणी दाखवली जाणार आहे. मात्र, चित्रपटाच्या घोषणा पोस्टरमध्ये वापरण्यात आलेली दृश्ये, डिझाइन आणि AI तंत्रज्ञानामुळे त्याला अनावश्यक वादाला सामोरे जावे लागले. या पार्श्वभूमीवर माहेश्वरी यांनी स्पष्टीकरण देत सांगितले की, “मी कोणाच्याही भावना दुखावण्यासाठी हा चित्रपट बनवत नाही. माझा उद्देश भारतीय सैन्याच्या शौर्याची कथा सांगण्याचा आहे.”
वाद वाढल्यानंतर दिग्दर्शक माहेश्वरी यांनी पोस्टर हटवले असून, नवीन पोस्टर लवकरच प्रसिद्ध केलं जाईल असंही सांगितलं आहे. त्यांनी हे देखील स्पष्ट केलं की, “हा केवळ सिनेमा नाही, तर देशाच्या भावना आहेत. जर कोणाच्या भावना दुखावल्या असतील, तर मी त्याची माफीनामा देतो.” सोशल मीडियावरून संतप्त प्रतिक्रिया उमटत असताना दिग्दर्शकाने केलेल्या या खुल्याशामुळे परिस्थिती शांत होत असल्याचं चित्र आहे.
