मुंबई : विलीनीकरणाच्या मागणीसाठी २९ ऑक्टोबरपासून एसटी कर्मचाऱ्यांनी संप पुकारला आहे. एसटी महामंडळाने संपकरी कर्मचाऱ्यांवर कारवाई सुरूच ठेवली असून आतापर्यंत ९ हजार कर्मचाऱ्यांना निलंबित करण्यात आल्याची माहिती एसटी महामंडळाने दिली. गुरुवारी ४९८ कर्मचाऱ्यांना निलंबित केले.
संप मिटत नसल्याने कठोर कारवाईचा बडगा उगारून संपावर गेलेल्या कायमस्वरूपी कर्मचाऱ्यांना महामंडळाने निलंबित केले. आतापर्यंत ९ हजार १४१ कर्मचाऱ्यांना निलंबित करण्यात आले आहे तर रोजंदारीवरील ३६ कर्मचाऱ्यांची सेवा समाप्त करण्यात आली. एकूण १ हजार ९२८ कर्मचाऱ्यांची सेवा समाप्ती झाल्याची माहिती महामंडळाने दिली. ही कारवाईही यापुढे सुरू ठेवण्यात येणार आहे.
दरम्यान, शासनामध्ये विलगीकरणाच्या मागणीसाठी संपावर असलेल्या धुळ्यातल्या एस. टी. कर्मचाऱ्यांनी कालपासून अन्नत्याग आंदोलनाला सुरूवात केली आहे. सर्व महिला, पुरुष कामगार एकत्रितपणे या आंदोलनात सामील झाले आहेत. तर अकोला जिल्ह्यातल्या एस.टी कर्मचाऱ्यांनी काल भजन गाऊन आंदोलन केलं आणि राज्य सरकार विरोधात घोषणाबाजी केली.
