Nilesh Ghaywal | धाराशिव जिल्ह्यातील अंद्रुड गावात नुकत्याच भरलेल्या जत्रेतील कुस्तीच्या कार्यक्रमात एक चकित करणारी घटना घडली. पुण्यातील खतरनाक आणि पूर्वीच्या काळात दहशतीचं दुसरं नाव ठरलेला डॉन निलेश घायवळ याच्यावर शुक्रवारी (११ एप्रिल २०२५) संध्याकाळी भर गर्दीत एक तरुण धाडसी हल्ला करून पसार झाला.
ही घटना ‘मुंबई तक’ या माध्यमाच्या हाती लागलेल्या एका व्हिडिओमुळे उघडकीस आली आहे. या व्हिडिओमध्ये घायवळ आपल्या काही साथीदारांसह कुस्तीच्या मैदानात फेरफटका मारताना दिसतो. तेवढ्यात गर्दीतून अचानक एक तरुण – सागर मोहोळकर – पुढे येतो आणि थेट घायवळच्या कानशिलात जोरदार थप्पड मारतो. हल्ल्याने गोंधळलेला घायवळ काही क्षणांसाठी संभ्रमित होतो आणि थोडं मागे सरकतो. दरम्यान, सागर मोहोळकर तेथून पळ काढतो.
कोण आहे सागर मोहोळकर?
सागर मोहोळकर हा अहमदनगर जिल्ह्यातील नानज गावचा रहिवासी असून कुस्तीशी त्याचा जुना संबंध आहे. तो कुस्ती पाहण्यासाठी अंद्रुडच्या जत्रेला हजर होता. परंतु, या निमित्तानं त्यानं घायवळवर थेट हल्ला करून उपस्थितांनाच नव्हे, तर पोलिस यंत्रणेलाही चकित केलं.
पोलिसांची प्रतिक्रिया आणि पुढील कारवाई
वाशी पोलिसांनी या घटनेची तत्काळ दखल घेतली असून सागर मोहोळकरविरोधात भारतीय दंड विधानाच्या कलम 194(2) अंतर्गत गुन्हा दाखल करण्यात आला आहे. पोलिसांनी त्याला ताब्यात घेतलं असून चौकशी दरम्यान समोर आलं आहे की, सागरवर याआधीही दोन खुनांचे गंभीर गुन्हे नोंदवले गेले आहेत.
हल्ल्यामागचं कारण अद्याप गुलदस्त्यात
सागर मोहोळकरनं निलेश घायवळवर हल्ला का केला, यामागचं कारण अद्याप स्पष्ट झालेलं नाही. ही एखादी जुनी दुश्मनी आहे की इतर काही वैयक्तिक कारण, याचा तपास सुरू आहे. मात्र, एक काळ शहरात धोक्याचं प्रतीक ठरलेला डॉन असलेल्या निलेश घायवळला (Nilesh Ghaywal) सार्वजनिक ठिकाणी झालेली ही मारहाण सध्या संपूर्ण महाराष्ट्रात चर्चेचा विषय ठरली आहे.
आपल्या भागातील बातम्या जाणून घेण्यासाठी जॉइन करा आझाद मराठीचा’चा व्हॉट्सअ‍ॅप ग्रुप
महत्वाच्या बातम्या :
पुण्यात पाण्याची टंचाई गंभीर; टँकरवर अवलंबून नागरिक
अमित शाहांकडून शिवरायांचा अपमान, महाराजांचा एकेरी उल्लेख केल्याचा राऊतांचा दावा
उबाठाचे माजी नगरसेवक संजय घाडी व उपनेत्या संजना घाडी यांचा शिवसेनेत प्रवेश | Eknath Shinde Shivsena
