Ashok Chavan | महाराष्ट्रातील विधानसभा निवडणुकीच्या तारखा जाहीर होण्यापूर्वीच मुख्यमंत्रिपदाचा चेहरा कोण असेल? याच्या चर्चांना उधाण आले आहे. सध्या महायुतीकडून एकनाथ शिंदे यांच्या नेतृत्वाखाली निवडणूक लढविण्याचा निर्णय घेण्यात आला आहे. याबाबत माजी मुख्यमंत्री आणि भाजप नेते अशोक चव्हाण यांनी प्रतिक्रिया दिली आहे. एबीपी न्यूजशी बोलताना माजी मुख्यमंत्री म्हणाले की, महायुती एकनाथ शिंदे यांच्या नेतृत्वाखाली निवडणूक लढवणार असून, मुख्यमंत्री कोण होणार याचा निर्णय निवडणूक लढवल्यानंतरच घेतला जाईल. हे तिन्ही पक्ष मिळून ठरवतील.
शिवसेना जास्त जागांवर निवडणूक लढवणार?
माजी मुख्यमंत्री अशोक चव्हाण (Ashok Chavan) यांना विचारण्यात आले की, लोकसभा निवडणुकीत महायुतीतील तीन पक्षांपैकी शिवसेनेने सर्वोत्तम कामगिरी केली आहे. त्या कामगिरीनुसार शिवसेना अधिक जागांवर निवडणूक लढवणार का?, यावर ते म्हणाले की, कोणाची कामगिरी काय हे सांगणे कठीण आहे, जिथे जिंकण्याची शक्यता आहे त्याला ती जागा द्यावी. शिवसेना असो वा भाजप किंवा अजित पवारांची राष्ट्रवादी. महायुतीचे तिन्ही पक्ष मिळून यावर निर्णय घेतील. जिथे ज्या पक्षाला चांगला पाठिंबा असेल त्याला ती जागा दिली जाईल.
निवडणुकीपूर्वीचा मुद्दा पुन्हा ठळक होणार का?
निवडणुकीपूर्वी मराठा आरक्षणाचा मुद्दा पुन्हा ठळक होणार का? याबाबत माजी मुख्यमंत्री चव्हाण यांनाही विचारणा करण्यात आली होती. त्यावर ते म्हणाले, “मराठा आरक्षणाचा निवडणुकीशी थेट संबंध आहे, यावर माझा विश्वास नाही. मराठा आरक्षणाचा मुद्दा गेल्या अनेक वर्षांपासून गाजत आहे. एकनाथ शिंदे यांच्या सरकारने यात बरीच प्रगती केली आहे. 10 टक्के आरक्षण लागू केले आहे. याचा फायदा लोकांना होत आहे, काही गोष्टी आहेत ज्या शाळा-महाविद्यालयांमध्ये ठरवल्या पाहिजेत, हा एक सामाजिक प्रश्न आहे, ज्यावर सर्व पक्षांनी एकत्र येऊन तोडगा काढला पाहिजे.”
आपल्या भागातील बातम्या जाणून घेण्यासाठी जॉइन करा आझाद मराठीचा’चा व्हॉट्सअ‍ॅप ग्रुप
