Hardik Pandya : घटस्फोटांच्या चर्चांदरम्यान वाईट काळाबद्दल हार्दिक पांड्याची पहिली प्रतिक्रिया, म्हणाला....

Hardik Pandya | टी20 विश्वचषक 2024 च्या आधी खेळल्या गेलेल्या सराव सामन्यात हार्दिक पांड्याने (Hardik Pandya) उत्कृष्ट फलंदाजीचे प्रदर्शन केले. टी-20 विश्वचषकापूर्वी टीम इंडियाने बांगलादेशविरुद्ध सराव सामना खेळला होता. या सामन्यात हार्दिक पांड्या चांगल्या फॉर्ममध्ये दिसला. हार्दिकने 23 चेंडूत 2 चौकार आणि 4 षटकारांच्या मदतीने 40* धावांची खेळी केली. याआधी आयपीएल 2024 मध्ये हार्दिक फॉर्ममध्ये दिसला होता. सराव सामन्यापूर्वी हार्दिकने आपल्या वाईट काळाबद्दल सांगितले.

हार्दिक पांड्याला अलीकडेच त्याच्या व्यावसायिक आणि वैयक्तिक आयुष्यात खूप वाईट प्रसंगांचा सामना करावा लागला. आयपीएल 2024 मध्ये हार्दिकला मुंबई इंडियन्सचा कर्णधार बनवण्यात आले होते. कर्णधार आणि खेळाडू म्हणून हार्दिक मुंबईसाठी फ्लॉप ठरला. हार्दिकच्या नेतृत्वाखाली मुंबई आयपीएलच्या गुणतालिकेत तळाच्या म्हणजे दहाव्या स्थानावर राहिली. याशिवाय, अष्टपैलू खेळाडू म्हणून त्याने फलंदाजी करताना 13 डावात केवळ 216 धावा केल्या आणि गोलंदाजी करताना 10.75 च्या इकॉनॉमीने धावा खर्च करताना 11 विकेट घेतल्या. हे प्रकरण केवळ क्रिकेटच्या वाईट टप्प्यापुरते मर्यादित राहिले नाही, दरम्यान त्याच्या घटस्फोटाची बातमीही समोर आली.

आता ‘स्टार स्पोर्ट्स’शी संवाद साधताना हार्दिक म्हणाला, “मी कठीँण काळापासून पळून जाणार नाही आणि लढत राहीन. मला विश्वास आहे की तुम्हाला लढ्यातच राहावे लागेल. कधी कधी आयुष्य तुम्हाला अशा परिस्थितीत आणते, जिथे गोष्टी कठीण आहेत, परंतु माझा विश्वास आहे की जर तुम्ही मैदान किंवा खेळ सोडला तर तुम्हाला तुमच्या खेळातून किंवा तुम्ही जे निकाल शोधत आहात त्यातून तुम्हाला हवे ते मिळणार नाही.”

हार्दिक पुढे म्हणाला, “म्हणून, हे अवघड आहे. पण त्याच वेळी, मी प्रक्रियेसोबत गेलो आहे. मी पूर्वी ज्या गोष्टी करायचो त्याच गोष्टी पाळण्याचा प्रयत्न केला. अशा गोष्टी घडतात. चांगले आणि वाईट काळ असतात, हे टप्पे आहेत. जे येतात आणि जातात ते ठीक आहेत. मी अशा टप्प्यांमधून अनेकदा गेलो आहे आणि मी यातूनही बाहेर येईन.”

टी20 विश्वचषकासाठी टीम इंडियाचा उपकर्णधार बनवलेल्या हार्दिकने पुढे सांगितले की, “मी माझ्या यशाला फारसे गांभीर्याने घेत नाही. मी जे काही चांगले केले आहे, ते मी पटकन विसरतो आणि पुढे जातो. कठीण काळात , ते म्हणतात तसंच आहे, म्हणून बाहेर पडा, स्वीकारा की तुम्ही तुमच्या कौशल्यात अधिक चांगले व्हाल, मेहनत कधीच व्यर्थ जात नाही.”