PM Modi Swearing-in Ceremony | बुधवारी (5 जून 2024) भाजपच्या नेतृत्वाखालील राष्ट्रीय लोकशाही आघाडी (NDA) च्या बैठकीनंतर पंतप्रधान नरेंद्र मोदी राष्ट्रपती द्रौपदी मुर्मू यांची भेट घेऊ शकतात. यावेळी पंतप्रधान मोदी सरकार स्थापनेसाठीचे समर्थन पत्र राष्ट्रपती मुर्मू यांना सुपूर्द करू शकतात.
शुक्रवारी (7 जून 2024) दुपारी 2.30 वाजता संसद भवनात एनडीएच्या खासदारांची बैठक होणार असल्याचेही सूत्रांनी सांगितले. या बैठकीला एनडीए शासित राज्यांचे मुख्यमंत्री, उपमुख्यमंत्री आणि विविध पक्षांचे अध्यक्ष उपस्थित राहणार आहेत. दुसऱ्या दिवशी म्हणजेच 8 जून रोजी नरेंद्र मोदी सलग तिसऱ्यांदा पंतप्रधानपदाची शपथ घेऊ शकतात. हा शपथविधी कार्यक्रम (PM Modi Swearing-in Ceremony) संध्याकाळी 7 ते 8 दरम्यान होऊ शकतो.
नवे सरकार कसे असेल?
2014 नंतर प्रथमच भाजप 272 च्या जादुई बहुमताच्या आकड्यापासून मागे पडल्याने यावेळी नव्या सरकारचा चेहरामोहरा बदलू शकतो, अशी शक्यता राजकीय वर्तुळात वर्तवली जात आहे. त्यामुळे भाजपला एनडीएमध्ये समाविष्ट असलेल्या अन्य पक्षांवर अवलंबून राहावे लागणार आहे.
कोणाला किती जागा मिळाल्या?
भाजपने 240 जागा जिंकल्या आहेत. तेलुगू देसम पार्टी (टीडीपी) 16, जेडीयू 12, मुख्यमंत्री एकनाथ शिंदे यांच्या शिवसेनेने 7 आणि चिराग पासवान यांच्या नेतृत्वाखालील लोक जनशक्ती पक्ष (रामविलास) 5 जागा जिंकल्या आहेत. ते सरकार स्थापनेत महत्त्वाची भूमिका बजावतील.
काँग्रेस नेतृत्वाने टीडीपी प्रमुख चंद्राबाबू नायडू आणि बिहारचे मुख्यमंत्री नितीश कुमार यांच्याशी संपर्क साधला आहे. मात्र, जेडीयू आणि टीडीपीने एनडीएमध्येच राहणार असल्याचे स्पष्ट केले आहे.
आपल्या भागातील बातम्या जाणून घेण्यासाठी जॉइन करा आझाद मराठीचा’चा व्हॉट्सअ‍ॅप ग्रुप
