हिंदू सण जल्लोषात साजरे करण्याची परवानगी द्या, अजानच्या आवाजाबाबत मुंबईकर नाराज – भाजपा
मुंबई – हिंदू नववर्षाच्‍या निमित्ताने (Hindu New Year) गुढीपाडव्‍याला निघणा-या शोभायात्रा आणि राम नवमीच्‍या मिरवणुका काढण्यास तसेच हिंदू सण ( Hindu Festival) जल्लोषात साजरे करण्यास परवानगी द्या, अशी मागणी मुंबई भाजपा शिष्टमंडळाने (Mumbai BJP) मुंबई पोलीस उपायुक्त यांची भेट घेऊन निवेदनाद्वारे केली.
मुंबई पोलीस प्रशासन (Mumbai Police) यंत्रणेकडून ध्वनिप्रदूषण रोखण्यासाठी नाविन्यपूर्ण कार्यक्रम आयोजित केले जात आहेत. ध्वनी प्रदूषणाच्या विविध कारणांचा मुंबईकर आपल्या दैनंदिन आयुष्यात सामना करत असतात. त्यातील एक महत्त्वाचे कारण म्हणजे प्रार्थना स्थळांमधून लाऊडस्पीकरवरून केली जाणारी अजान आहे. कोणीही अजानच्या विरोधात नसून लाऊडस्पीकरच्या माध्यमातून मोठ्या आवाजात अजान दिल्यामुळे ध्वनिप्रदूषण होत असून मुंबईकरांचा याला विरोध आहे. मुंबईकरांच्या भावना मुंबई पोलीस उपायुक्तांपर्यंत पोहोचाव्यात यासाठी मुंबई भाजपा शिष्टमंडळानं पोलीस उपायुक्तांची भेट घेतली आणि हिंदू सण जल्लोषात साजरे करण्याची परवानगी द्यावी, अशी विनंती करणारे निवेदन सुपूर्द केले.
निवेदनात नमूद करण्यात आले आहे की, दि. २ एप्रिल २०२२ रोजी हिंदू नववर्षानिमित्त गुढीपाडवाच्या दिवशी सालाबादप्रमाणे मुंबईत ठिकठिकाणी नववर्ष स्वागत यात्रेचे आयोजन करण्यात येते. हिंदू नववर्ष स्वागत यात्रेची तयारी मुंबईत जल्लोषात सुरु आहे. या यात्रेला परवानगी द्यावी, त्याचबरोबर १० एप्रिल २०२२ रोजी रामनवमी, १४ एप्रिल २०२२ रोजी भारतरत्न डॉ. बाबासाहेब आंबेडकर जयंती व १६ एप्रिल रोजी हनुमान जयंती हे सण साजरे करण्यासाठी संपूर्ण हिंदू समाज उत्सुक असून या कार्यक्रमांना परवानगी द्यावी.
या भेटीदरम्यान मुंबई भाजपा अध्यक्ष व आमदार मंगल प्रभात लोढा, आमदार अतुल भातखळकर, आमदार कालिदास कोळंबकर, आमदार राहुल नार्वेकर, आचार्य पवन त्रिपाठी, दक्षिण मध्य मुंबई जिल्हाअध्यक्ष राजेश शिरवडकर, मुंबई भाजपा उत्तर भारतीय मोर्चा अध्यक्ष जयप्रकाश सिंह आदी मान्यवर उपस्थित होते.