Tara Sahdev Case: पत्नीला इस्लाम धर्म स्वीकारण्यास भाग पाडणाऱ्या रणजितला जन्मठेपेची शिक्षा

By Shweta Chidmalwad Last updated Oct 6, 2023

Tara Sahdev Case: तुम्हाला कदाचित राष्ट्रीय रायफल शूटर तारा शहदेव आठवत असेल, जिने तिच्या मुस्लिम पतीवर जबरदस्तीने धर्म परिवर्तन करून तिच्यावर लैंगिक अत्याचार केल्याचा आरोप केला होता. याप्रकरणी न्यायालयाचा निर्णय आला आहे. रांचीच्या सीबीआय कोर्टाने आरोपी पती रणजीत कोहली उर्फ रकीबुल हसन याला धर्म परिवर्तन, लैंगिक छळ आणि हुंडाबळी प्रकरणी जन्मठेपेची शिक्षा सुनावली आहे.

या प्रकरणात दुसरा आरोपी झारखंड उच्च न्यायालयाचे माजी रजिस्ट्रार (दक्षता) मुश्ताक अहमद याला 15 वर्षांची सक्तमजुरी तर रणजीत कोहली ऊर्फ रकीबुलची आई कौशल राणी हिला 10 वर्षांची शिक्षा ठोठावण्यात आली आहे. तिन्ही गुन्हेगारांना प्रत्येकी पन्नास हजार रुपयांचा दंडही ठोठावण्यात आला आहे.

सीबीआय न्यायालयाचे विशेष न्यायाधीश पीके शर्मा यांच्या न्यायालयाने 30 सप्टेंबर रोजी तिघांनाही दोषी घोषित केले होते, मात्र त्यांच्या शिक्षेचा निकाल गुरुवारी जाहीर करण्यात आला. न्यायालयाने रणजीत कोहली उर्फ रकीबुलला आयपीसीच्या कलम 120बी, 376, 323, 298, 506 आणि 496 अंतर्गत दोषी ठरवले आहे. कौशल राणीला आयपीसीच्या कलम 120बी, 298, 506 अन्वये दोषी ठरवण्यात आले आहे आणि हायकोर्टाचे माजी रजिस्ट्रार मुश्ताक अहमद हे आयपीसीच्या कलम 120बी आणि 298 अंतर्गत दोषी आढळले आहेत.

उल्लेखनीय आहे की, 2014 साली धर्मांतर, लैंगिक छळ आणि हुंडाबळीचा हा मुद्दा संपूर्ण देशात गाजला होता. उच्च न्यायालयाच्या आदेशानुसार 2015 मध्ये हे प्रकरण सीबीआयने ताब्यात घेतले होते. तपास पूर्ण झाल्यानंतर, सीबीआयने 2017 मध्ये रंजीत उर्फ रकीबुल, त्याची आई कौशल राणी आणि झारखंड उच्च न्यायालयाचे तत्कालीन निबंधक (दक्षता) मुश्ताक अहमद यांच्याविरुद्ध आरोपपत्र दाखल केले होते.

आरोपींविरुद्ध 2 जुलै 2018 रोजी आरोप निश्चित करण्यात आले होते. सीबीआयने केलेल्या चर्चेदरम्यान तारा शाहदेवने कोहली उर्फ रकीबुलवर केलेले धर्म परिवर्तन, लैंगिक छळ आणि हुंडाबळीचे आरोप खरे ठरले. या संपूर्ण कटात कोहलीची आई आणि उच्च न्यायालयाचे बडतर्फ रजिस्ट्रार (दक्षता) यांचाही सहभाग असल्याचे बोलले जात आहे.
सीबीआयने या प्रकरणी न्यायालयात एकूण 26 साक्षीदारांचे जबाब नोंदवले असून अनेक पुरावेही न्यायालयासमोर सादर करण्यात आले आहेत.

कोण आहे तारा शाहदेव आणि काय होतं प्रकरण
उल्लेखनीय आहे की, राष्ट्रीय नेमबाज तारा शाहदेवने रणजित सिंह कोहलीवर आपली फसवणूक करून लग्न केल्याचा आरोप केला होता. 7 जुलै 2014 रोजी दोघांचे लग्न झाले होते. लग्नानंतर तिला कळले की रणजीत सिंग कोहलीने आधीच आपला धर्म बदलून इस्लाम स्वीकारला होता आणि त्याने आपले नाव बदलून रकीबुल हसन ठेवले होते. तारा शाहदेवसोबत लग्न केल्यानंतर रणजीत उर्फ रकीबुलने तिच्यावर इस्लाम धर्म स्वीकारण्यासाठी दबाव आणण्यास सुरुवात केली. तारा शाहदेवने पोलिसांत नोंदवलेल्या जबानीत सांगितले होते की, असे न केल्याने तिला मारहाण करण्यात आल. शाहदेवच्या म्हणण्यानुसार त्यांना अनेक दिवस उपाशी ठेवले होते.