मुंबई इंडियन्सने हार्दिकला कर्णधार बनवल्याने सूर्यकुमार निराश! पत्नी देविशानेही व्यक्त केली नाराजी

By Shweta Chidmalwad On Dec 16, 2023

Rohit Sharma: मुंबई इंडियन्सने (Mumbai Indians) रोहित शर्माच्या जागी आयपीएलच्या पुढील हंगामासाठी हार्दिक पांड्याला (Hardik Pandya) कर्णधार बनवले आहे. रोहित १० वर्षे मुंबईचा कर्णधार होता. त्याने संघाला पाच वेळा विजेतेपद मिळवून दिले. रोहितला कर्णधारपदावरून हटवल्यानंतर चाहते निराश झाले आहेत. केवळ चाहतेच नाही तर मुंबईचे काही खेळाडूही दु:खी आहेत. ज्येष्ठ फलंदाज सूर्यकुमार यादवने सोशल मीडियावर आपली व्यथा मांडली आहे.

सूर्यकुमार यादवने त्याच्या इंस्टाग्राम स्टोरीमध्ये एक हृदय तुटल्याचा इमोजी शेअर केला आहे. तो सोशल मीडियावर व्हायरल झाला. रोहितला कर्णधारपदावरून हटवल्याने सूर्यकुमार संतापला आहे, असे लोकांना वाटते. रोहित कर्णधारपदावरून पायउतार झाल्यास सूर्याला ही जबाबदारी मिळू शकते, असे बोलले जात होते. त्याने फ्रँचायझीशी सातत्य राखले आहे. गेल्या मोसमातही त्याने संघाचे नेतृत्व केले होते, मात्र हार्दिकला कर्णधार करण्यात आले. हार्दिक दोन वर्षांपूर्वी मुंबई सोडून गुजरातमध्ये आला होता. तिथे त्याने दोन मोसमात कर्णधारपद भूषवले. आता तो मुंबई संघात परतला असून त्याला कर्णधार बनवण्यात आले आहे.

सूर्याच्या पत्नीचीही निराशा झाली
सूर्यकुमार यादवच्या इन्स्टाग्राम स्टोरीनंतर त्याची पत्नी देविशा शेट्टीनेही तिच्या इन्स्टाग्राम स्टोरीमध्ये आपल्या भावना व्यक्त केल्या आहेत. मात्र, काही वेळाने तिने ही स्टोरी हटवले. देविशा शेट्टीने लिहिले होते की, “तुम्ही ज्या प्रकारे लोकांशी वागता ते नेहमीच लक्षात राहील.”