सलमान खानसोबत काम केलेल्या अभिनेत्यावर जीवघेणा हल्ला! डोक्याला पडले 12 टाके

By Shweta Chidmalwad On Dec 31, 2023

Aryan Arora Attack Case: बॉलिवूडमधील अनेक दिग्गज कलाकारांसोबत काम केलेले आग्रा येथील तरुण कलाकार आर्यन अरोरा याच्यावर जीवघेणा हल्ला झाला. मिळालेल्या माहितीनुसार, क्रिकेट अकादमीतून गाडी काढण्यावरून आर्यनचा केअरटेकरसोबत वाद झाला होता. दरम्यान, आरोपीने त्याच्या डोक्यावर स्टंपने वार केले. त्यामुळे अभिनेत्याच्या डोक्याला दुखापत झाली. आर्यनची प्रकृती चिंताजनक असल्याचे सांगण्यात येत आहे. त्याच्यावर कमला नगर येथील रुग्णालयात उपचार सुरू आहेत.

काय आहे संपूर्ण प्रकरण?
अभिनेता आर्यन अरोरा हा दयालबाग, ताजनगरचा रहिवासी आहे. ही घटना शनिवारी सायंकाळी चार वाजता घडली. आर्यनचे वडील मधुकर अरोरा यांनी दिलेल्या माहितीनुसार आर्यन त्याच्या मित्रांसोबत खासपुरा सिकंदरपूर गावात असलेल्या ढिल्लॉन क्रिकेट अकादमीमध्ये गेला होता. तेथे आर्यनच्या अकादमीचे केअरटेकर श्री कृष्णा यांच्याशी गाडी काढण्यावरून वाद झाला. हळूहळू वाद वाढत गेला, त्यामुळे केअरटेकरने आर्यनच्या डोक्यात वार केले. त्यामुळे तो जागीच बेशुद्ध पडला. घटनेनंतर केअरटेकर फरार झाला. घटनास्थळी उपस्थित असलेल्या आर्यनच्या मित्रांनी कसा तरी त्याला कमला नगर येथील रश्मी मेडिकेअर रुग्णालयात दाखल केले. सोबतच कुटुंबीयांनाही माहिती देण्यात आली.

पोलिसांनी गुन्हा दाखल केला
मीडिया रिपोर्ट्सनुसार आर्यनच्या डोक्यात 12 टाके पडले आहेत. त्याच्यावर आयसीयूमध्ये उपचार सुरू आहेत. सीटी स्कॅननंतर परिस्थिती स्पष्ट होईल. या प्रकरणी न्यू आग्रा पोलिस स्टेशनचे प्रभारी निरीक्षक राजीव सिंह यांनी सांगितले की, कुटुंबीयांच्या तक्रारीच्या आधारे कलम 307, 323, 504 आणि 506 अंतर्गत गुन्हा दाखल करण्यात आला आहे. आरोपी फरार आहे. त्याच्या शोधासाठी पोलिसांची पथके तैनात करण्यात आली आहेत.

सुटीत आग्रा येथे आला
आर्यन त्याच्या आईसोबत मुंबईला शिफ्ट झाला आहे. तिथेच तो अभ्यास करतो. सुटीत तो आग्रा येथील आपल्या घरी आला होता. त्याने अनेक बॉलिवूड चित्रपटांमध्ये काम केले आहे. त्याने सलमान खान, सिद्धार्थ मल्होत्रा, परिणीती चोप्रा यांच्यासह अनेक कलाकारांसोबत काम केले होते. जबरिया जोडीने त्याच्या फिल्मी करिअरची सुरुवात केली. आर्यनने राधे, गुंजन सक्सेना यांसारख्या अनेक चित्रपटांमध्येही काम केले आहे. ओटीटी प्लॅटफॉर्मवर ब्रोकन बट ब्यूटी फुल, आउट ऑफ लव्ह, दिल्लीचा सुलतान यांसारख्या वेब सीरिजमध्येही काम केले आहे. हिरो सायकल, मॅगी, डेटॉल, विराट कोहलीसोबत टू यम, हॉट स्टार, नॉर सूप अशा 32 हून अधिक जाहिरातींमध्ये काम केले आहे.