माजी मुख्यमंत्र्यांनी दिवाळीत केली वीजचोरी; प्रकरण समोर येताच म्हणाले…

By azad desk On Nov 14, 2023

Diwali 2023: काँग्रेसने मंगळवारी (14 नोव्हेंबर) कर्नाटकचे माजी मुख्यमंत्री आणि जेडीएसचे प्रदेशाध्यक्ष एचडी कुमारस्वामी यांच्यावर दिवाळीच्या वेळी जेपी नगरातील घराला सजावटीच्या दिव्यांनी उजळण्यासाठी चोरीची वीज वापरल्याचा आरोप केला. सत्ताधारी काँग्रेसनेही या प्रकरणाला महत्त्व देत ‘एक्स’ या सोशल मीडिया प्लॅटफॉर्मवर एक व्हिडिओ पोस्ट केला आहे. जेडीएल नेत्याच्या या कृतीवर जोरदार टीका होत आहे.

हे प्रकरण निदर्शनास आल्यानंतर माजी पंतप्रधान एचडी देवेगौडा यांचे पुत्र कुमारस्वामी म्हणाले की, ही त्यांची चूक नसून एका खाजगी डेकोरेटरची चूक आहे, ज्याने थेट जवळच्या विद्युत खांबाला कनेक्शन दिले. त्यांनी सांगितले की, त्यांना हे कळताच त्यांनी तात्काळ ते काढून टाकले आणि घराच्या मीटर बोर्डवरून वीज कनेक्शन घेतले.

पीटीआय या वृत्तसंस्थेने दिलेल्या माहितीनुसार, काँग्रेसने त्यांचा खरपूस समाचार घेतला आणि म्हटले की, "जगातील एकमेव प्रामाणिक व्यक्ती एचडी कुमारस्वामी यांचे जेपी नगर निवासस्थान विजेच्या खांबांवरून थेट बेकायदेशीर वीज कनेक्शनसह सजावटीच्या दिव्यांनी उजळले होते. एका माजी मुख्यमंत्र्याला इतक्या गरिबीचा सामना करावा लागत आहे की त्यांनी वीजचोरी सुरू केली आहे, ही शोकांतिका आहे.

पक्षाने पुढे म्हटले की, काँग्रेस सरकारच्या ‘गृहज्योती’ योजनेत निवासी जोडणीसाठी दरमहा २०० युनिट मोफत वीज दिली जाते, दोन हजार युनिट नाही. यावर कुमारस्वामी यांनी X ला उत्तर दिले, ‘मला या अविवेकीपणाबद्दल खेद वाटतो. बंगलोर वीज पुरवठा कंपनी (BESCOM) च्या अधिकार्‍यांनी येऊन तपासणी करावी आणि नोटीस जारी करावी. मी दंड भरेन. या प्रकरणाला महत्त्व दिल्याबद्दल त्यांनी काँग्रेसवर निशाणा साधला आणि ते म्हणाले, मी कोणत्याही राज्याच्या संपत्तीचा अपहार केला नाही आणि कोणाचीही जमीन बळकावली नाही. मला संपत्तीची एवढी तहान नाही की ती कुणाच्या रक्ताने शमवता येईल.’