कोट्यवधींचा व्यवसाय, 14 लाख लोकांना रोजगार… मात्र या एका पत्राने ‘सहारा’चा खेळ संपवला

By Shweta Chidmalwad On Nov 15, 2023

Subrata Roy Dies: सहारा इंडिया समूहाचे (Sahara India Group) प्रमुख सुब्रत रॉय (Subrata Roy) यांचे मंगळवारी निधन झाले. मुंबईत त्यांनी अखेरचा श्वास घेतला. ते 75 वर्षांचे होते. सहारा कुटुंबाचे प्रमुख सुब्रत रॉय दीर्घकाळापासून गंभीर आजाराने त्रस्त होते. त्यांच्यावर मुंबईतील खासगी रुग्णालयात उपचार सुरू होते.

दिवस कसे फिरले ?

सुब्रत रॉय सहारा यांचा जन्म 10 जून 1948 रोजी झाला होता. ते भारतातील आघाडीचे व्यापारी आणि सहारा इंडिया परिवाराचे संस्थापक होते. त्यांना देशभरात ‘सहरश्री’ म्हणूनही ओळखले जात होते. सुब्रत रॉय यांचा व्यवसाय आणि सर्व काही सुरळीत चालले होते, पण जेव्हा त्याने शेअर मार्केटमध्ये प्रवेश करण्याचा निर्णय घेतला तेव्हा वाईट दिवस सुरू झाले.

2009 मध्ये, सहारा इंडिया रिअल इस्टेट कॉर्पोरेशन लिमिटेड आणि सहारा हाउसिंग इन्व्हेस्टमेंट कॉर्पोरेशन लिमिटेड या सहाराच्या दोन कंपन्यांसाठी आयपीओ लॉन्च करण्यासाठी त्यांनी सेबीकडे परवानगी मागितली. यासाठी सेबीने त्यांना कंपनीशी संबंधित तपशीलवार कागदपत्रे सादर करण्यास सांगितले. सहाराने आपली कागदपत्रे सादर करताच सेबीला त्यात मोठी अनियमितता आढळून आली. सेबीला असे आढळून आले की सहारा कंपन्यांनी लिस्ट न करता 3 कोटी लोकांकडून 24,000 कोटी रुपये उभे केले आहेत. यानंतर सेबीचे लक्ष सहाराच्या इतर कंपन्यांकडेही गेले आणि सेबीने सहाराला १२ हजार कोटी रुपयांचा दंड ठोठावला.

वृत्तांवर विश्वास ठेवला तर एका पत्राने सहाराचे संपूर्ण रहस्य उघड केले आहे. सहारामध्ये सुरू असलेल्या कथित अनियमिततेची संपूर्ण कहाणी उघड झाली होती. 4 जानेवारी 2010 रोजी रोशन लाल नावाच्या व्यक्तीने नॅशनल हाऊसिंग बँकेला पत्र लिहिले. आपल्या पत्रात रोशन लाल यांनी दावा केला आहे की ते इंदूरमध्ये राहतात आणि व्यवसायाने सीए आहेत. या पत्रात त्यांनी NHB ला सहारा इंडिया रिअल इस्टेट कॉर्पोरेशन आणि सहारा हाऊसिंग इन्व्हेस्टमेंट कॉर्पोरेशन या लखनौच्या सहारा ग्रुपच्या दोन कंपन्यांनी जारी केलेल्या रोख्यांची चौकशी करण्याची विनंती केली होती. ते म्हणाले की, मोठ्या संख्येने लोकांनी सहारा समूहाच्या कंपन्यांचे रोखे खरेदी केले आहेत, परंतु ते नियमानुसार जारी करण्यात आलेले नाहीत. या पत्रामुळे सहाराच्या अडचणी वाढल्या. चौकशीनंतर त्याला तुरुंगात जावे लागले.