“जशी सचिनला वॉर्नची फिरकी, तशी मलाही जय शहांच्या वडिलांची गुगली खेळता येते”, कन्हैया कुमारचा टोला

By Shweta Chidmalwad On Oct 29, 2023

Kanhaiya Kumar Criticize Amit Shah: काँग्रेसचे युवा नेते कन्हैया कुमार यांनी उपमुख्यमंत्री देवेंद्र फडणवीस (Devendra Fadnavis) यांची खिल्ली उडवली आहे. राज्यातील सद्यपरिस्थितीवर भाष्य करताना त्यांनी फडणवीसांची दया येते, कारण आजकाल त्यांच्यापेक्षा त्यांच्या पत्नी अमृता फडणवीस (Amruta Fadnavis) यांच्या गाण्यांचे व्हिडिओ पाहिले जातात, अशा शब्दांत टीका केली आहे.

आजकाल देवेंद्र फडणवीसांपेक्षा त्यांच्या पत्नीच्या (अमृता फडणवीस) गाण्याचे व्हिडीओ जास्त बघितले जातात. मला फडणवीसांची दया येते, देवेंद्र फडणवीस ‘मी पुन्हा येईन,’असं म्हणत होते. पण केंद्रातल्या त्यांच्या मदाऱ्यांनी त्यांचा पार ‘अडवाणी’ केला आहे. १०५ आमदार असूनही दुसऱ्या पक्षातल्या माणसाला मुख्यमंत्रीपदी बसवून स्वत: त्यांच्या हाताखाली उपमुख्यमंत्री म्हणून त्यांना काम करावं लागत आहे, असे म्हणत कन्हैया कुमार यांनी फडणवीसांची खिल्ली उडवली आहे.

तसेच भाजपाच्या वॉशिंग मशीनमध्ये कोणतं डिटर्जंट वापरतात की पक्षात येण्याआधी भ्रष्ट असलेला नेता भाजपामध्ये येताच अचानक पवित्र होतो, असा सवालही त्यांनी यावेळी उपस्थित केला.

शेवटी केंद्रिय गृहमंत्री अमित शहा (Amit Shah) यांना अप्रत्यक्ष टोमणा मारताना कन्हैया कुमार म्हणाले, काँग्रेसमध्ये आल्यापासून भाजपचं आमच्यावरचं प्रेम खूप वाढलं आहे. पण ज्याप्रमाणे सचिन तेंडुलकरला शेन वॉर्नची फिरकी खेळण्याची सवय झाली होती, त्याचप्रमाणे मलाही जय शाह यांच्या वडिलांची गुगली खेळता येते, असा शालजोडीतला टोलाही त्यांनी हाणला.