शुभमंगल सावधान! हार्दिक अन् अक्षयाने बांधली लग्नगाठ, राजेशाही थाटाची सर्वत्र चर्चा
‘तुझ्यात जीव रंगला’ फेम राणादा आणि पाठक बाई ही जोडी आता खऱ्या आयुष्यात एकत्र दिसणार आहे. २ डिसेंबर रोजी पुण्यात हार्दिक जोशी (Hardeek Joshi) आणि अक्षया देवधर (Akshaya Deodhar) लग्नबंधनात अडकले आहेत. स्वत: हार्दिक आणि अक्षया लग्नातील आणि लग्नापूर्वीच्या वेगवेगळ्या विधींचे सुंदर फोटो आणि व्हिडिओ सोशल मीडियावर शेअर करत आहेत. त्यातही लग्नाच्या दिवशी हार्दिक आणि अक्षया यांनी मराठमोळा लूक करत सर्वांचेच लक्ष वेधले.
अक्षया देवधरने लग्नात लाल रंगाची नऊवारी साडी नेसली आहे. नऊवारी साडी, हिरवा चुडा आणि साजश्रृंगार असा अक्षया देवधरचा नववधू साज आहे. अक्षयाने तिच्या नेलआर्टमध्ये तिच्या लग्नाची तारीख आणि त्या दोघांचे नावाचे पहिले अक्षर म्हणजेच ‘अहा’ असे लिहले आहे. अक्षयाची मेहंदीदेखील आकर्षक आहे. तिने मेहंदीत सप्तपदीची डिझाइन काढली आहे.
अक्षयाबरोबरच हार्दिकही राजेशाही थाटात खूपच सुंदर दिसत आहे. हार्दिकने जुन्या राजांप्रमाणे आपला पेहराव केला आहे. तसेच गळ्यात आकर्षक अशी माळही घातली आहे. हे दोघेही एकत्र खूपच छान दिसत आहेत.