राजस्थानमध्येही झाली पेपरफुटी; गुजरातला पळून जाण्याच्या तयारीत असलेल्या युथ कॉंग्रेसच्या नेत्याला अटक
जयपूर – 26-27 डिसेंबर रोजी झालेल्या राजस्थान ग्राम विकास अधिकारी (VDO) परीक्षेचा पेपर फुटल्याप्रकरणी पोलिसांनी तिघांना अटक केली आहे. त्यापैकी एक काँग्रेस पक्षाच्या एनएसयूआय या विद्यार्थी संघटनेचे प्रदेश सरचिटणीस आहेत. अटक करण्यात आलेल्या तिघांनी पैसे घेऊन भरती परीक्षेचा पेपर लीक केल्याचा दावा पोलिसांनी केला आहे. यापूर्वी राजस्थानमध्ये आरईईटी, सब इन्स्पेक्टर रिक्रूटमेंट आणि जेईएनच्या परीक्षेचा पेपरही लीक झाला आहे.
ग्राम विकास अधिकारी पदाच्या ३८९६ पदांच्या भरतीसाठी २६-२७ डिसेंबर रोजी झालेल्या या परीक्षेसाठी सुमारे १५ लाख उमेदवारांनी अर्ज केले होते. ही परीक्षा चार टप्प्यांत दोन दिवस चालली. पोलिसांनी सांगितले की, 27 डिसेंबर रोजी सिरोहीमध्ये संशयास्पद वाहनांची तपासणी सुरू होती. यादरम्यान एक क्रमांक नसलेले वाहन थांबले असता चालकाने वाहन घेऊन पळ काढण्यास सुरुवात केली. पोलिसांनी नाकाबंदी करून गाडी थांबवली असता, पेपर फुटणाऱ्या टोळीचा पर्दाफाश झाला. त्यानंतर पोलिसांनी गाडीतील इंदुबाला या विद्यार्थिनीसह तिघांना अटक केली.
इंदुबाला यांनी सांगितले की, टोळीतील सदस्यांनी 27 डिसेंबरच्या पहिल्या इनिंगचा पेपर लीक करून त्यांना व्हॉट्सअॅपद्वारे उत्तरपत्रिका पाठवली होती. यासाठी एनएसयूआयचे प्रदेश सरचिटणीस प्रकाश गोदरा आणि त्यांच्या साथीदारांसोबत 15 लाखांचा सौदा करण्यात आल्याचे सांगण्यात आले. ही बाब उघडकीस आल्यानंतर प्रकाश गोदरा गुजरातला पळून जाण्याच्या तयारीत होता, मात्र पोलिसांनी त्यालाही अटक केली.
विशेष म्हणजे एवढे सर्व घडून देखील परीक्षा घेणाऱ्या राजस्थान स्टाफ सिलेक्शन बोर्डाने अद्याप पेपर फुटल्याचे मान्य केलेले नाही. आतापर्यंत पेपर आऊट झाल्याची ठोस माहिती मिळाली नसल्याचे बोर्डाचे म्हणणे आहे. सध्या पोलीस या प्रकरणाचा तपास करत असून, प्रश्नपत्रिका प्रत्यक्षात फुटली होती का, याचा शोध घेण्यासाठी उत्तरपत्रिका जुळवल्या जात आहेत.
यापूर्वीही पेपरफुटीच्या घटना घडल्या आहेत
सप्टेंबर २०२१ पासून राजस्थानमधून एकापाठोपाठ एक पेपर फुटल्याच्या बातम्या येत आहेत. त्यापैकी, REET आणि उपनिरीक्षक भरती परीक्षेतील पेपर लीक प्रकरणे प्रमुख आहेत.