पुणे हादरलं! चित्रपटात संधी देण्याचे आमिष दाखवून १५ वर्षीय मुलीवर लॉजवर अत्याचार

Pune: पुण्यातील हडपसर येथील काळेपडळ येथे एका डान्स अकादमीचे नृत्य शिक्षक सुशील राजेंद्र कदम (वय ३२, रा. गोपाळपट्टी, यशोप्रभा सोसायटी शेजारी, मांजरी बुद्रुक) यांनी चित्रपटात संधी देण्याचे आमिष दाखवून १५ वर्षीय अल्पवयीन मुलीवर बलात्कार केल्याची माणसुकीला काळीमा फासणारी घटना घडली आहे. या घटनेने पुणे हादरले आहे. या प्रकरणी हडपसर पोलिस ठाण्यात बलात्कार व ‘पोस्को’अंतर्गत गुन्हा दाखल करण्यात आला आहे. दरम्यान, पोलिसांनी आरोपीला अटक केली आहे.

हडपसर पोलिसांनी दिलेल्या माहितीनुसार, १५ वर्षीय विद्यार्थी काळेपडळ येथील डान्स अकादमीमध्ये नृत्य शिकत होती. तेथे सुशील नृत्य शिकवत होता. चित्रपटात काम मिळवून देण्याचे आमीष दाखवले आणि तिला वेगवेगळ्या लॉजवर नेले. तेथे आईवडिलांना ठार मारण्याची धमकी देऊन त्याने या मुलीवर अत्याचार केले.

मुलीच्या आईला संशय आल्याने तिने पाठलाग करून एका लॉजवर या दोघांना पकडले असता, हा प्रकार समोर आला. या प्रकरणी १५ वर्षी पीडित मुलीने हडपसर पोलीस ठाण्यामध्ये तक्रार दिल्याने आरोपी विरोधात बलात्कार व बाललैंगिक अत्याचार प्रतिबंधक कायद्यांतर्गत गुन्हा दाखल करण्यात आला आहे. हडपसर पोलिसांनी तत्काळ आरोपीला बेड्या ठोकल्या आहेत. पुढील तपास सहाय्यक पोलिस निरीक्षक प्रवीण अबदगिरी करीत आहेत.