राष्ट्रवादीला पश्चिम महाराष्ट्रात मोठा धक्का बसण्याची शक्यता; मातब्बर नेता शिवसेनेच्या वाटेवर

Pune – पंढरपूरमध्ये युवा नेते भगीरथ भालके यांना गळाला बीआरएसने लावल्यानंतर आता पिंपरी चिंचवडमध्ये शिवसेना राष्ट्रवादीला धक्का देण्याच्या तयारीत आहे. पिंपरी-चिंचवड शहरातील राष्ट्रवादीचे एकमेव आमदार अण्णा बनसोडे (Anna Bansode) मुख्यमंत्री एकनाथ शिंदे यांच्या थेट संपर्कात असल्याची जोरदार चर्चा होत आहे, अशी बातमी दिव्य मराठी या दैनिकाने दिली आहे.

या वृत्तानुसार, गटबाजीने पिंपरीतील राष्ट्रवादीच्या बालेकिल्ल्याला २०१४ च्या विधानसभेपासून तडे गेले. २०१९ मध्ये मविआचे सरकार आल्यावर भाजपचे नगरसेवक राष्ट्रवादीकडे झुकू लागले. मात्र, सत्ता बदलताच झुकणे थांबले. आता आमदार बनसोडे पक्षापासून दूर जात असल्याचे दिसून येत आहे.

ते पक्षाच्या कार्यक्रमांना अनेकदा दिसत नाहीत, पण गेल्या आठवड्यात मुख्यमंत्री एकनाथ शिंदे पिंपरीत बनसोडेंच्या कार्यालयावर गेले होते. तेव्हापासून ते शिंदेसेनेकडे जाणार असल्याची चर्चा वाढली आहे. मात्र, मी राष्ट्रवादीकडूनच लढणार असल्याचा दावा बनसोडे यांनी केला आहे.