अबब! टी२० क्रिकेटमधील आतापर्यंतची विक्रमतोड कामगिरी, फक्त २० षटकात बनल्या ४२७ धावा
Argentina Women: अर्जेंटिना महिला क्रिकेट संघाने T20I चे सर्व विक्रम मोडीत काढले. अर्जेंटिनाच्या महिलांनी 20 षटकांच्या सामन्यात 427 धावा केल्या आणि चिलीचा विक्रमी 364 धावांनी पराभव केला. चिलीचा महिला संघ 63 धावांत सर्वबाद झाला. अर्जेंटिनाच्या सलामीच्या फलंदाजांनी 350 धावांची भागीदारी केली.
चिलीचा महिला संघ अर्जेंटिना दौऱ्यावर गेला आहे. ब्युनोस आयर्समध्ये दोन्ही देशांदरम्यान पहिला T-20 आंतरराष्ट्रीय सामना खेळला गेला. नाणेफेक जिंकून प्रथम गोलंदाजी करण्याचा निर्णय घेतला. अर्जेंटिनासाठी, लुसिया टेलर आणि अल्बर्टिना गॅलन यांनी सर्व T-20 रेकॉर्ड मोडून एक महान विक्रम रचला. अर्जेंटिनाने 1 गडी गमावून 427 धावा केल्या.
सलामीवीर फलंदाजांनी 350 धावांची विक्रमी भागीदारी केली
लुसिया टेलरने 84 चेंडूत 27 चौकारांच्या मदतीने 169 धावा केल्या. त्याचवेळी टेलरची जोडीदार अल्बर्टिना गॅलनने 84 चेंडूंत 23 चौकारांच्या मदतीने नाबाद 145 धावा केल्या. दोघांनी 16.5 षटकात 350 धावांची भागीदारी केली. टी-20 सामन्यातील ही आतापर्यंतची सर्वात मोठी भागीदारी होती. तिसऱ्या क्रमांकावर फलंदाजीला आलेल्या मारिया कॅस्टिनेरासने 16 चेंडूत नाबाद 40 धावा केल्या.
एका षटकात 52 धावा
विशेष म्हणजे या महान विक्रमात अर्जेंटिनाच्या डावात एकही षटकार मारला नाही. एवढेच नाही तर एकाच षटकात 52 धावा झाल्या. हा अवांछित विक्रम चिलीची गोलंदाज फ्लोरनेसिया मार्टिनेझच्या नावावर नोंदवला गेला. मार्टिनेझने एकाच षटकात 17 नो-बॉल टाकले. तर, लक्ष्याचा पाठलाग करताना चिलीचा संघ केवळ 63 धावा करू शकला.
सात फलंदाजांना खातेही उघडता आले नाही
चिली महिला संघातील जेसिका मिरांडा (27 धावा) ही एकमेव फलंदाज होती जिने दुहेरी आकडा गाठला. सात फलंदाजांना खातेही उघडता आले नाही. चिलीचा संपूर्ण संघ 15 व्या षटकात सर्वबाद झाला. 63 धावांमध्ये 29 अतिरिक्त धावांचा समावेश होता.
महत्त्वाच्या बातम्या-
Navratri : श्री एकविरा देवी नवरात्रोत्सव यात्रेनिमित्त जुन्या मुंबई-पुणे महामार्गावरील वाहतुकीत बदल
नवरात्रीत स्वत:ला एक सुंदर लुक द्यायचा असेल तर या टिप्स अवश्य फॉलो करा