पुण्यात NIA,ATS ची मोठी कारवाई; PFI चा कार्यकर्ता रझी खानच्या मुसक्या आवळल्या

Pune – टेरर फंडिंग प्रकरणी देशभरात एनआयए आणि ईडीचे छापे सुरू आहेत. दरम्यान, दिल्लीतून एक मोठी बातमी समोर येत आहे. पीएफआयचा अध्यक्ष परवेझ आणि त्याच्या भावाला येथून अटक करण्यात आली आहे. याशिवाय पीएफआयचा राष्ट्रीय सचिव व्हीपी नजरुद्दीनलाही ताब्यात घेण्यात आले आहे. एनआयएचे पथक त्यांना सोबत घेऊन गेले असल्याचे सांगण्यात आले. एनआयए देशातील 10 राज्यांमध्ये छापे टाकत आहे. यादरम्यान 100 हून अधिक जणांना ताब्यात घेण्यात आले आहे.

दरम्यान, पीएफआयचं महाराष्ट्रातील मुख्य कार्यालय पुण्यातील कोंढवा भागात आहे. या कार्यालयावर NIA, ATS आणि इतरही काही तपास यंत्रणांनी छापे टाकले आहेत. या छाप्यात ‘PFI’च्या कार्यालयातील काही साहित्य जप्त करण्यात आले आहे. यावेळी दहशतवाद विरोधी पथकाने कारवाई करत PFI संघटनेच्या पूर्वाश्रमीच्या दोन सदस्यांना ताब्यात घेतले आहे. कयूम शेख आणि रजी अहमद खान अशी दोघांची नावे आहेत. रजी अहमद खान हा पुणे जिल्ह्यातील पीएफआयचा कार्यकर्ता होता. त्याने या आधी अनेक आंदोलनांमध्ये सहभाग घेतला होता.

मुंबई, नाशिक औरंगाबाद आणि नांदेड येथे समाजात तेढ वाढवणाऱ्या बेकायदेशीर कृत्यांमध्ये सहभागी होण्यासाठी आणि कट रचल्याबद्दल चार गुन्हे दाखल करण्यात आले आहेत. आतापर्यंत पीएफआयशी संबंधित 20 जणांना ताब्यात घेण्यात आले आहे.

NIA चा सर्वात मोठा छापा
अधिका-यांनी सांगितले की छाप्यादरम्यान NIA आणि ED ने दहशतवाद्यांना समर्थन केल्याच्या आरोपाखाली पॉप्युलर फ्रंट ऑफ इंडिया (PFI) च्या 100 हून अधिक कार्यकर्त्यांना ताब्यात घेतले. अधिकार्‍यांच्या मते, हे छापे प्रामुख्याने दक्षिण भारतात टाकले जात आहेत आणि एनआयएने याला “आतापर्यंतची सर्वात मोठी तपास मोहीम” म्हणून संबोधले आहे. एनआयएने सांगितले की, दहशतवाद्यांना कथितपणे निधी पुरवणे, त्यांच्यासाठी प्रशिक्षणाची व्यवस्था करणे आणि प्रतिबंधित संघटनांमध्ये सामील होण्यासाठी लोकांना फसवणे यात गुंतलेल्यांच्या छुप्या ठिकाणांवर छापे टाकले जात आहेत.

अधिकाऱ्यांच्या म्हणण्यानुसार, दहा राज्यांमध्ये छापे टाकले जात आहेत आणि यावेळी पीएफआयच्या प्रमुख नेत्यांसह सुमारे 100 कार्यकर्त्यांना ताब्यात घेण्यात आले आहे. पीएफआयने एक निवेदन जारी करून म्हटले आहे की, “पीएफआयच्या राष्ट्रीय, राज्यस्तरीय आणि स्थानिक नेत्यांच्या घरांवर छापे टाकले जात आहेत. राज्य समिती कार्यालयावरही छापे टाकण्यात येत आहेत. आंध्र प्रदेशातून 5, आसाममधून 9, दिल्लीतून 3, कर्नाटकातून 20, केरळमधून 22, मध्य प्रदेशातून 4 आणि महाराष्ट्रातून 20 जणांना अटक करण्यात आली आहे.

मध्य प्रदेशातील इंदूर आणि उज्जैन येथेही एनआयएचे छापे पडले असून त्यात पीएफआयच्या राज्य नेत्यांना ताब्यात घेण्यात आले आहे. यामध्ये एनआयएने मध्य प्रदेशातील उज्जैन आणि इंदूर येथून 4 नेत्यांना ताब्यात घेतले आहे. मध्य प्रदेशातील तळांवरून टेरर फंडिंग खाते आणि साहित्य जप्त करण्यात आले आहे.

महाराष्ट्रात एटीएसचे छापे

महाराष्ट्र एटीएसने पीएफआयविरुद्ध चार स्वतंत्र गुन्हेही दाखल केले आहेत. महाराष्ट्र एटीएसचे छापे देखील आज संपूर्ण राज्यात सुरू असून त्यात पुणे, औरंगाबाद, बीड, परभणी पर्व, मालेगाव, मुंबई आणि नवी मुंबईचा समावेश आहे. एटीएसने दिलेल्या माहितीनुसार, 20 जणांना ताब्यात घेण्यात आले आहे. मौलाना सैफुर रहमान याला मालेगाव येथून ताब्यात घेण्यात आले आहे. सैफुर रहमान हे पीएफआयचे नाशिक जिल्हा अध्यक्ष आहेत.