IND vs PAK Weather: बहुप्रतिक्षित भारत-पाकिस्तान सामन्यावर पावसाचे सावट? असे असेल अहमदाबादचे हवामान

By Shweta Chidmalwad On Oct 14, 2023

Weather Update: भारत आणि पाकिस्तान (India vs Pakistan) यांच्यात शनिवारी (१४ ऑक्टोबर) विश्वचषक सामना (World Cup 2023) रंगणार आहे. अहमदाबादच्या नरेंद्र मोदी स्टेडियमवर (Narendra Modi Stadium) दोन्ही संघ आमनेसामने येणार आहेत. सध्याच्या एकदिवसीय विश्वचषकात दोन्ही संघांचा फॉर्म चांगला आहे. भारताने ऑस्ट्रेलिया आणि अफगाणिस्तानविरुद्ध विजय मिळवला आहे. त्याचवेळी पाकिस्तानने नेदरलँड आणि श्रीलंकेचा पराभव केला होता. आता रोहित शर्मा (Rohit Sharma) आणि बाबर आझम (Babar Azam) यांच्या नजरा विजयाची हॅट्ट्रिक करण्यावर असतील. दरम्यान, हवामानाबाबत मोठी बातमी समोर आली आहे.

अनेक दिवसांपासून चाहते या सामन्याची वाट पाहत होते. सामन्यादरम्यान स्टेडियममध्ये एक लाखाहून अधिक प्रेक्षक उपस्थित राहू शकतात. प्रत्येकाला रोमांचक सामना पाहायचा आहे, परंतु पाऊस आशा धुळीस मिळवू शकतो. भारतीय हवामान खात्याने (IMD) अहमदाबाद शहर आणि उत्तर गुजरातमध्ये सामन्यादरम्यान हलक्या पावसाची शक्यता वर्तवली आहे.

हवामान खात्याने काय म्हटले?
IMD ने शेअर केलेल्या नवीनतम हवामान अपडेटनुसार, 14 आणि 15 ऑक्टोबर रोजी उत्तर गुजरात आणि अहमदाबादच्या काही भागात हलका पाऊस पडू शकतो. हवामान खात्याने सांगितले की, “गुजरातमध्ये पुढील पाच दिवस हवामान कोरडे राहण्याचा अंदाज आहे. 14 ऑक्टोबर रोजी अहमदाबाद जिल्ह्यात काही ठिकाणी हलका पाऊस पडू शकतो. अहमदाबादमधील हवामान केंद्राच्या संचालक मनोरमा मोहंती म्हणाल्या, “आकाश ढगाळ असेल. दुसऱ्या दिवशी अहमदाबाद आणि बनासकांठासारख्या उत्तरेकडील जिल्ह्यांमध्ये हलका पाऊस पडेल. साबरकांठा आणि अरवलीत हलका पाऊस पडू शकतो.”

हवामान असे असू शकते
अहमदाबादमध्ये तापमान 30-35 अंश सेल्सिअसच्या दरम्यान राहण्याची शक्यता आहे. याशिवाय अहमदाबादमध्ये आर्द्रतेची पातळी 50 टक्के राहण्याची शक्यता आहे. नरेंद्र मोदी स्टेडियमचे तापमान दुपारी 35 अंश सेल्सिअसपर्यंत पोहोचू शकते.

पावसामुळे सामना रद्द झाला तर?
पावसामुळे सामना रद्द झाल्यास भारत आणि पाकिस्तानला प्रत्येकी एक गुण मिळेल. या सामन्यासाठी कोणताही राखीव दिवस नाही. स्पर्धेतील बाद फेरीच्या सामन्यांसाठी राखीव दिवस आहेत. अशी परिस्थिती उद्भवू नये आणि त्यांना संपूर्ण सामना पाहायला मिळावा, अशी चाहत्यांची इच्छा आहे.