सचिन तेंडुलकर, विराट कोहली, अमिताभ बच्चन आणि…; ‘या’ सेलिब्रिटींना अयोध्येत राम मंदिराच्या अभिषेकासाठी निमंत्रण
Ayodhya Ram Mandir Consecration Ceremony: उत्तर प्रदेशातील अयोध्येत बांधण्यात येत असलेल्या मंदिराचा अभिषेक सोहळा पुढील वर्षी 22 जानेवारी रोजी होणार आहे. या सोहळ्यासाठी देशभरातील आणि जगभरातील सुमारे 7 हजार VVIP, मान्यवर आणि परदेशी प्रतिनिधींना आमंत्रित करण्यात आले आहे. पंतप्रधान नरेंद्र मोदी यांना यापूर्वीच निमंत्रित करण्यात आले आहे.
या सोहळ्याला राम मंदिर ट्रस्टने क्रिकेट दिग्गज मास्टर ब्लास्टर सचिन तेंडुलकर, माजी कर्णधार विराट कोहली, बॉलीवूड सुपरस्टार अमिताभ बच्चन, अब्जाधीश उद्योगपती मुकेश अंबानी आणि गौतम अदानी यांच्यासह 3,000 VVIP लोकांना विशेष आमंत्रण दिले आहे.
पीटीआय या वृत्तसंस्थेनुसार, श्री रामजन्मभूमी तीर्थ क्षेत्र ट्रस्टने या सोहळ्यात प्रसिद्ध टीव्ही मालिका रामायणातील कलाकारांना आमंत्रित केले आहे, ज्यांनी भगवान श्री राम आणि माता सीता यांच्या भूमिका केल्या आहेत. भगवान रामाची भूमिका साकारणारा अभिनेता अरुण गोविल आणि माता सीतेची भूमिका साकारणारी अभिनेत्री दीपिका चिखलिया हे देखील या सोहळ्यात सहभागी होणार आहेत.
अयोध्येत पोलिस गोळीबारात बळी पडलेल्या कारसेवकांच्या कुटुंबीयांनाही निमंत्रित करण्यात येत असल्याचे सूत्रांचे म्हणणे आहे. राष्ट्रीय स्वयंसेवक संघ (आरएसएस) प्रमुख मोहन भागवत, योगगुरू रामदेव यांचाही व्हीव्हीआयपींच्या यादीत समावेश आहे. ट्रस्टने देशभरातून चार हजार संतांनाही आमंत्रित केले आहे.
रामजन्मभूमी तीर्थ क्षेत्र ट्रस्टचे सरचिटणीस चंपत राय यांनी सांगितले की, प्राणप्रतिष्ठा सोहळ्यासाठी ५० देशांतून प्रत्येकी एक प्रतिनिधी आमंत्रित करण्याचाही प्रयत्न सुरू आहे. त्याचबरोबर 1992 मध्ये राम मंदिर आंदोलनात प्राण गमावलेल्या 50 कारसेवकांच्या कुटुंबीयांनाही आमंत्रित करण्यात आले आहे. याशिवाय देशातील न्यायाधीश, शास्त्रज्ञ, लेखक आणि कवींनाही निमंत्रण पत्रे पाठवण्यात आली आहेत.
राय म्हणाले की, संत, पुजारी, शंकराचार्य, धार्मिक नेते, माजी नोकरशहा, निवृत्त लष्करी अधिकारी, वकील, संगीतकार आणि पद्मश्री आणि पद्मभूषण पुरस्काराने सन्मानित व्यक्तींनाही आमंत्रित करण्यात आले आहे.
महत्वाच्या बातम्या-
बाजारात मिळतं एकूण १० प्रकाराचं मीठ, जाणून घ्या आरोग्यासाठी कोणते मीठ आहे उत्तम