रोहित विराटसारखा तंदुरुस्त झाला तरच पुढील विश्वचषक खेळू शकेल, माजी दिग्गजाने स्पष्टच सांगितलं

By Shweta Chidmalwad On Nov 25, 2023

Muttiah Muralitharan: रोहित शर्माच्या T20 मधील भवितव्याबद्दल अलीकडे बरीच चर्चा झाली आहे. T20 विश्वचषक 2022 पासून, रोहित शर्माने T20 मध्ये भारतासाठी एकही सामना खेळलेला नाही. त्याच्या अनुपस्थितीत हार्दिक पांड्याने संघाचे नेतृत्व केले. अलीकडेच पीटीआयच्या एका रिपोर्टमध्ये सांगण्यात आले की, रोहित शर्माने स्वतः टी20 खेळणार नसल्याचे सांगितले आहे. कारण संघातील युवा खेळाडूंना संधी मिळावी आणि संघात टिकून राहावे असे त्याला वाटते. हा अहवाल समोर आल्यापासून रोहितच्या पुढील वर्षी होणाऱ्या T20 विश्वचषक 2024 मध्ये (T20 World Cup 2024) सहभागी होण्याबाबत अनेक तर्कवितर्क लावले जात आहेत.

दरम्यान, श्रीलंकेचा माजी क्रिकेटपटू मुथय्या मुरलीधरनने भारतीय कर्णधार रोहित शर्माच्या T20 मधील भविष्याविषयी सांगितले. मुरलीधरनने सांगितले की, रोहितची इच्छा असल्यास त्याने पुढील वर्षी जूनमध्ये होणाऱ्या टी-20 विश्वचषक 2024 मध्ये खेळावे. याबाबत बोलताना मुरलीधरन म्हणाला की, विराट कोहलीप्रमाणे त्याच्या फिटनेसवर लक्ष केंद्रित केले तर तो आणखी एक विश्वचषक खेळू शकतो.

हिंदुस्तान टाईम्सशी बोलताना मुरलीधरनने रोहितच्या 2023च्या विश्वचषकातील कामगिरीबद्दल सांगितले, “जर तुम्ही त्याची एकदिवसीय विश्वचषकातील कामगिरी पाहिली तर त्याने दिलेली सुरुवात, त्याने कोणत्या प्रकारची स्ट्राइक रेटने फलंदाजी केली. तो स्पर्धेत कधीही अपयशी ठरला नाही. आणि तो केवळ 36 वर्षांचा आहे, तो तरुण आहे. त्याने विराटप्रमाणे त्याच्या फिटनेसवर लक्ष केंद्रित केले तर तो आणखी एक विश्वचषक खेळू शकतो. लोक इतके कठोर का बोलत आहेत की तरुण खेळाडूंना आणण्याची हीच योग्य वेळ आहे. परंतु रोहित फिट होईपर्यंत त्याला खेळू द्या, तो नक्कीच चांगली कामगिरी करू शकतो.”

तो आणखी एक विश्वचषक नक्कीच खेळेल
मुथय्या मुरलीधरनने विश्वचषक 2023मध्ये रोहित शर्माच्या स्ट्राइक रेटबद्दल बोलताना सांगितले की, तो पुढील स्पर्धेतही खेळणार आहे. तो म्हणाला, “रोहितने वनडेमध्ये 130 च्या स्ट्राइक रेटने फलंदाजी केली, जी टी-20 साठी वाईट नाही. तो एक अनुभवी खेळाडू आहे. तुम्हाला 35 नंतर तुमच्या फिटनेसवर अधिक मेहनत करावी लागते. इच्छा असेल तर तो खेळेल. मला वाटतं तो नक्कीच दुसरा विश्वचषक खेळेल. हे त्याच्या मनात आहे.”