निर्मला सीतारामन राज्यांच्या अर्थमंत्र्यांसोबत ‘या’ महत्वाच्या विषयावर करणार चर्चा
नवी दिल्ली- आगामी अर्थसंकल्प 2022 बाबत अर्थमंत्री निर्मला सीतारामन गुरुवारी राज्यांच्या अर्थमंत्र्यांशी चर्चा करणार आहेत. 30 डिसेंबर रोजी दिल्लीतील विज्ञान भवनात ही बैठक होणार असल्याची माहिती सूत्रांनी दिली. मागील बैठकींप्रमाणे ही बैठक आमने-सामने होणार आहे.
अर्थसंकल्पाच्या तयारीच्या संदर्भात अर्थमंत्री विविध भागधारकांसोबत बैठका घेत आहेत. ही बैठक त्या साखळीचा एक भाग आहे. सीतारामन 2022-23 चा अर्थसंकल्प सादर करतील, बहुधा 1 फेब्रुवारीला. अर्थमंत्री म्हणून सीतारामन यांचा हा चौथा अर्थसंकल्प असेल.
सीतारामन यांनी आतापर्यंत कॉर्पोरेट्स, वित्तीय क्षेत्रातील कंपन्या, कामगार संघटना, कृषी तज्ञ आणि आघाडीच्या अर्थतज्ज्ञांच्या बैठका घेतल्या आहेत. आयकर स्लॅबचे तर्कसंगतीकरण, डिजिटल सेवांना पायाभूत सुविधांचा दर्जा आणि हायड्रोजन स्टोरेजला प्रोत्साहन यासारख्या सूचना या बैठकांमध्ये देण्यात आल्या आहेत.
गेल्या आठवड्यात जारी करण्यात आलेल्या अर्थ मंत्रालयाच्या निवेदनानुसार, 15 डिसेंबर ते 22 डिसेंबर दरम्यान अशा आठ बैठका झाल्या आहेत. 15 डिसेंबर रोजी अर्थमंत्र्यांनी विविध क्षेत्र आणि उद्योग क्षेत्रातील लोकांशी अर्थसंकल्पपूर्व चर्चा सुरू केली आहे. शुक्रवारी, अर्थमंत्र्यांनी आगामी सर्वसाधारण अर्थसंकल्प 2022-23 संदर्भात राजधानीत दोन सत्रांमध्ये विविध क्षेत्रातील भागधारकांशी पूर्व-अर्थसंकल्प सल्लामसलत केली. ही बैठक ऑनलाइनही घेण्यात आली.