तेलंगणात कॉंग्रेसच्या अडचणी वाढण्याच्या शक्यता; वायएस शर्मिला यांनी घेतला टोकाचा निर्णय

By Team Azad On Oct 13, 2023

Telangana Assembly Elections 2023: तेलंगणामध्ये पुढील महिन्याच्या 30 तारखेला विधानसभा निवडणुका होणार आहेत. निवडणूक आयोगाने तारीख जाहीर केल्यानंतर सर्वच राजकीय पक्ष पूर्ण ताकदीने निवडणुकीच्या रिंगणात उतरले आहेत. दरम्यान, काँग्रेस आणि वायएसआर तेलंगणा पक्ष यांच्यात युतीबाबत चर्चा होऊ शकली नाही.
यासोबतच माजी मुख्यमंत्री वायएस राजशेखर रेड्डी यांची मुलगी आणि वायएसआरटीपीचे संस्थापक प्रमुख वायएस शर्मिला यांनी तेलंगणातील सर्व 119 जागांवर उमेदवार उभे करण्याची घोषणा केली आहे. वायएसआर तेलंगणा पक्ष राज्यातील सर्व जागांवर एकटाच निवडणूक लढवेल, त्यानंतर काँग्रेस-वायएसआरटीपी युतीबाबत सुरू असलेल्या अटकळांना पूर्णविराम मिळाला आहे.

याआधी, तेलंगणातील सत्ताधारी पक्ष भारत राष्ट्र समिती (BRS) विरुद्ध दोन्ही पक्ष एकत्रितपणे लढण्याची शक्यता होती. शर्मिला यांनी या प्रकरणासाठी तब्बल 4 महिने वाट पाहिली आणि आता सर्व जागांवर निवडणूक लढवण्याची घोषणा केली. एनडीटीव्हीच्या वृत्तानुसार, गेल्या महिन्यात शर्मिला यांनी काँग्रेसच्या माजी अध्यक्षा सोनिया गांधी आणि राहुल गांधी यांचीही याप्रकरणी भेट घेतली होती. आता वाय.एस. शर्मिला म्हणाल्या की, केसीआर (मुख्यमंत्री के. चंद्रशेखर राव) विरोधी मतांचे विभाजन केल्याबद्दल आम्हाला कोणीही दोष देऊ शकत नाही.

उल्लेखनीय आहे की शर्मिला या आंध्र प्रदेशचे मुख्यमंत्री वायएस जगन मोहन रेड्डी यांची बहीण आहे आणि शर्मिला यांनी आंध्र प्रदेशात काँग्रेस मजबूत करण्यासाठी तिचा भाऊ जगन रेड्डी यांच्यासोबत काम करावे अशी काँग्रेसची इच्छा होती. पुढील वर्षी आंध्र प्रदेशात विधानसभेच्या निवडणुका होणार आहेत, परंतु वायएस शर्मिला यांनी काँग्रेसचा प्रस्ताव धुडकावून लावत आता बीआरएस आणि काँग्रेसच्या विरोधात एकट्याने निवडणूक लढवण्याची घोषणा केली आहे.

युती करण्याबाबतचा अंतिम निर्णय सप्टेंबरच्या अखेरीस घेतला जाईल, असे शर्मिला यांनी दोन आठवड्यांपूर्वी सांगितले होते. युतीबाबत चर्चा न झाल्यास पक्ष सर्व 119 जागांवर निवडणूक लढवेल, असे पक्षाने म्हटले होते. तेलंगणात ३० नोव्हेंबरला मतदान होणार असून ३ डिसेंबरला निकाल जाहीर होणार आहेत.