“या वयात आम्हाला आई, आजीच्या भूमिका दिल्या जातात, पण…”, अभिनेत्री आशा पारेख यांनी व्यक्त केली खंत
मुंबई: 60-70 च्या दशकातील प्रसिद्ध अभिनेत्री तनुजा आणि आशा पारेख (Asha Parekh) या त्यांच्या काळातील हिट चित्रपटांसाठी प्रसिद्ध आहेत. दोघीही त्यांच्या पात्रांसाठी चर्चेत असतात. पण ज्या गोष्टीसाठी अभिनेत्री आशा पारेख आज चर्चेत आहेत, ते म्हणजे त्यांनी केलेले वक्तव्य आहे. आशा पारेख यांच्यासाठी आजकाल कोणीही मुख्य भूमिका कशी लिहित नाही? याबद्दल त्या मोकळेपणाने बोलल्या आहेत. आशा पारेखचा असा विश्वास आहे की त्यांना आता आई आणि आजींच्या भूमिका ऑफर केल्या जात आहेत, तर अमिताभ बच्चन (Amitabh Bachchan) अजूनही चित्रपटांमध्ये मुख्य भूमिकेत दिसत आहेत.
आशा पारेख बॉलीवूडच्या सध्याच्या स्थितीवर अत्यंत नाराज आहेत. त्यांनी दिलेल्या ताज्या मुलाखतीवरून याचा अंदाज येऊ शकतो. अभिनेत्री म्हणाल्या, ‘आज या वयातही लोक अमिताभ बच्चन यांच्यासाठी मुख्य भूमिका लिहित आहेत. लोक आमच्यासाठी अशा भूमिका का लिहित नाहीत? चित्रपटासाठी महत्त्वाच्या असलेल्या काही भूमिकाही आपल्याला मिळायला हव्यात. मात्र असे होत नाही. एकतर आपल्याला आई, आजी किंवा बहिणीची भूमिका ऑफर केली जाते, पण प्रश्न असा आहे की त्या भूमिकांमध्ये कोणाला रस आहे?’
आपला मुद्दा पुढे करत आशा पारेख म्हणाल्या, ‘आमच्या जमान्यात महिलांचे करिअर लग्न झाल्यावर संपले असे मानले जायचे. पण, आता तसे नाही. चित्रपटसृष्टीत 50-55 वर्षांच्या नायकाला 20-20 वर्षांच्या मुलांसोबत काम करायला स्वीकारलं जातं, तर आम्हाला का नाही?’
दरम्यान, अमिताभ बच्चन, जे 80 वर्षांचे आहेत, अजूनही फिल्म इंडस्ट्रीमध्ये सुपर सक्रिय आहेत. गेल्या वर्षी त्यांचे पाच चित्रपट प्रदर्शित झाले होते. या सर्व चित्रपटांमध्ये ते मुख्य भूमिकेत होते. या चित्रपटांमध्ये ‘ब्रह्मास्त्र’, ‘झुंड’, ‘रनवे 34’, ‘उंचाई’ आणि ‘गुड बाय’ यांचा समावेश होता.