भक्ताने पीएम मोदींच्या आईच्या वजनाइतके सोने केले दान, काशी विश्वनाथाचा दरबार झळाळला 

 वाराणसी : पंतप्रधान नरेंद्र मोदी यांचे वाराणसीशी अतूट नाते आहे.  PM मोदींनी जगातील सर्वात जुने शहर काशीलाही आपल्या ड्रीम प्रोजेक्ट्सने चमकवले आहे. काही दिवसांपूर्वी पंतप्रधानांनी काशी विश्वनाथ कॉरिडॉरचे उद्घाटन केले होते. त्यानंतर मंदिराचे सौंदर्य खुलून दिसते. आता काशी विश्वनाथच्या एका भक्ताने असे काही केले आहे ज्याची सर्वत्र चर्चा होत आहे. झी न्यूज ने याबाबत वृत्त दिले आहे.

पंतप्रधान मोदींच्या कार्याने प्रभावित होऊन दक्षिण भारतातील एका भक्ताने काशी विश्वनाथसाठी सोने दान केले आहे. इतके सोने.. ज्याची तुम्ही कल्पनाही करू शकत नाही. काशी विश्वनाथ मंदिरासाठी भक्ताने पीएम मोदींच्या आई हिराबेन यांच्या वजनाएवढे सोने दान केले आहे.

दानात मिळालेल्या सोन्याने बाबांचा दरबारही उजळून निघाला आहे. लाइव्ह हिंदुस्थानच्या वृत्तानुसार, विश्वनाथ मंदिराच्या गर्भगृहाच्या सर्व भिंती या सोन्याने सोनेरी करण्यात आल्या आहेत. गर्भगृहाच्या आतील भिंती 37 किलो सोन्याने सजवल्या आहेत. खालच्या भागावर आणि दरवाजाच्या चौकटीवर सोने लावण्यासाठी 24 किलो सोने लावावे, असे सांगण्यात आले आहे. हे महाशिवरात्रीनंतर करण्यात येणार असल्याचे मंदिर सूत्रांनी सांगितले.

दक्षिण भारतातील या भक्ताने आपली ओळख उघड केलेली नाही हे लक्षात घेण्यासारखे आहे. मिळालेल्या माहितीनुसार, हा भाविक तीन महिन्यांपूर्वी विश्वनाथ मंदिरात आला होता. मंदिराच्या गाभार्‍यात किती सोने लागेल याचा संपूर्ण हिशोब त्यांनी तयार केला होता. मंदिर प्रशासनाकडून हिरवा कंदील मिळाल्यानंतर सोने लावण्याचे काम सुरू झाले.

योगायोगाची बाब म्हणजे रविवारी जेव्हा बाबांच्या गर्भगृहात सोने बसवण्याचे काम पूर्ण झाले तेव्हा पंतप्रधान मोदी वाराणसीत उपस्थित होते. पीएम मोदींनीच बाबांच्या सुवर्ण दरबाराची विधिवत पूजा केली. मंदिराच्या गर्भगृहात केलेल्या या सुवर्णकामानंतर प्रथमच पूजा केल्यानंतर पंतप्रधान मोदी म्हणाले की, हे अद्भुत आणि अकल्पनीय आहे. विश्वाच्या नाथांचा दरबार सोन्याचा मुलामा देऊन एक वेगळीच प्रतिमा साकारत आहे.