“भरपूर मुलं जन्माला घाला, पंतप्रधान मोदी त्यांना..”, २ पत्नी व ८ मुलांचं कुटुंब असलेले भाजपा मंत्री हे काय बोलून गेले?

By Shweta Chidmalwad On Jan 11, 2024

Rajasthan Minister Giving Birth Remark Controversy: राजस्थान सरकारचे मंत्री बाबूलाल खराडी (Babulal Kharadi) यांचे एक अजब विधान आले आहे. त्यांनी लोकांना सांगितले आहे की त्यांना भरपूर मुले असावीत. त्यांना काळजी करण्याची गरज नाही कारण पंतप्रधान नरेंद्र मोदी (PM Narendra Modi) घरे देणार आहेत आणि गॅसही स्वस्त होणार आहे. उदयपूर जिल्ह्यातील झाडोल मतदारसंघातून दुसऱ्यांदा आमदार बनलेले बाबुलाल खराडी यांना दोन पत्नी आणि 8 मुले आहेत.

राजस्थान सरकारमधील कॅबिनेट मंत्री बाबूलाल खराडी यांचे विधान चर्चेत असण्यामागचे कारण म्हणजे त्यांनी स्वतः दोनदा लग्न केले आहे. त्यांच्या पहिल्या पत्नीचे नाव तेजू देवी आणि दुसऱ्या पत्नीचे नाव मणिदेवी आहे. त्यांना दोन्ही पत्नींपासून 8 मुले आहेत.

मंगळवारी उदयपूरमध्ये एका जाहीर सभेला संबोधित करताना आदिवासी विकास मंत्री म्हणाले की, कोणीही उपाशी झोपू नये आणि डोक्यावर छप्पर नसावे हे पंतप्रधान मोदींचे स्वप्न आहे. तुम्ही खूप मुलं जन्माला घाला. प्रधानमंत्रीजी तुमची घरे बांधतील, मग काय अडचण आहे? केंद्र सरकारने एलपीजी सिलिंडरच्या किमती 200 रुपयांनी कमी केल्या आहेत आणि राजस्थानमधील भाजप सरकार आता उज्ज्वला योजनेअंतर्गत लोकांना 450 रुपयांना सिलिंडर उपलब्ध करून देत आहे.”