चीनने अरुणाचलमधील 15 ठिकाणांची नावे बदलली
नवी दिल्ली- चीनी कम्युनिस्ट पक्षाचे मुखपत्र मानल्या जाणाऱ्या ग्लोबल टाइम्स या इंग्रजी दैनिकाने गुरुवारी यासंबंधीचे वृत्त प्रसिद्ध केले.त्यात म्हटले आहे की चीनच्या नागरी व्यवहार मंत्रालयाने बुधवारी जाहीर केले की त्यांनी झंगनान (अरुणाचल प्रदेशचे चिनी नाव) च्या 15 ठिकाणांची चीनी, तिबेटी आणि रोमनमध्ये नावे जाहीर केली आहेत.
दरम्यान, भारताच्या परराष्ट्र मंत्रालयाने अरुणाचल प्रदेशातील काही ठिकाणांचे नाव बदलण्याच्या चीनच्या हालचालीवर तीव्र आक्षेप घेतला आहे आणि म्हटले आहे की अरुणाचल प्रदेश हा नेहमीच भारताचा अविभाज्य भाग आहे आणि पुढेही राहील.याबाबतच्या वृत्तांना उत्तर देताना परराष्ट्र मंत्रालयाने म्हटले आहे की, चीनने यापूर्वीही असे केले आहे, परंतु त्यामुळे वस्तुस्थिती बदलत नाही. याआधी चीनने अरुणाचल प्रदेशातील १५ ठिकाणांसाठी चिनी, तिबेटी आणि रोमन भाषेत नवीन नावांची यादी जाहीर केली आहे.
अहवालानुसार, चीन सरकारने 15 ठिकाणांची नावे बदलून त्यांचे निश्चित अक्षांश आणि रेखांश दिले आहेत यापैकी 8 निवासी ठिकाणे, 4 पर्वत, 2 नद्या आणि एक पर्वतीय खिंड आहेत. ग्लोबल टाइम्सने बीजिंगस्थित चीन-तिबेट संशोधन केंद्रातील तज्ज्ञ लियान झियांगमिन यांना दिलेल्या अहवालात म्हटले आहे की, या ठिकाणांच्या नावांबाबत राष्ट्रीय सर्वेक्षणानंतर ही घोषणा करण्यात आली आहे आणि ही नावे शेकडो वर्षांपासून आहेत.
या ठिकाणांची प्रमाणित नावे ठेवणे हे योग्य पाऊल असून भविष्यात या भागात आणखी ठिकाणांची नावे ठेवली जातील, असेही या तज्ज्ञाने सांगितले.या अहवालाला उत्तर देताना, भारतीय परराष्ट्र मंत्रालयाने गुरुवारी एक निवेदन जारी केले. मंत्रालयाचे प्रवक्ते अरिंदम बागची यांनी या निवेदनात म्हटले आहे की, आम्ही ते पाहिले आहे.
अरुणाचल प्रदेशचे नाव बदलण्याचा चीनने प्रयत्न करण्याची ही पहिलीच वेळ नाही. चीनला एप्रिल 2017 मध्येही अशी नावे ठेवायची होती. ते पुढे म्हणाले, अरुणाचल प्रदेश हा नेहमीच भारताचा अविभाज्य भाग राहिला आहे आणि नेहमीच राहील. अरुणाचल प्रदेशमध्ये नावं ठेवल्याने ही वस्तुस्थिती बदलणार नाही. बीबीसीने याबाबत वृत्त दिले आहे.