“फालतूतला फालतू माणूस, ज्याची लायकी नाही…”, शरद पोंक्षेंनी ट्रोल करणाऱ्यांना सुनावलं
मराठी मनोरंजनसृष्टीत आपल्या उत्तम अभिनयाचा ठसा उमटवणाऱ्या शरद पोंक्षे (Sharad Ponkshe) यांच्या मुलीनेही अभिमानास्पद कामगिरी केली आहे. शरद पोंक्षे यांची लाडकी मुलगी सिद्धी पोंक्षे (Siddhi Ponkshe) हिचे वैमानिक बनण्याचे स्वप्न पूर्ण झाले आहे. मात्र मुलीच्या यशाबद्दल माहिती देणारी सोशल मीडिया पोस्ट केल्यापासून शरद पोंक्षेंवर टीकेची भडिमार होत आहे. सामान्य सोशल मीडिया वापरकर्त्यांपासून ते मराठी कलाकारापर्यंत अनेकांनी त्यांना खडेबोल सुनावले आहेत. आता शरद पोंक्षेनी त्यांना सुनावणाऱ्यांना तिखट प्रत्युत्तर दिले आहे.
ट्रोलिंगबद्दल शरद पोंक्षे म्हणाले, “फालतूतला फालतू माणूस, ज्याची लायकी नाही, ज्याने दोन ओळी कधी आयुष्यात वाचल्या नाहीत तो उठतो आणि ट्रोल करतो. त्याला काही निती-नियम नाही, त्याला काही संहिता नाही, त्याला कुठले कायदे-कानून नाही. खोट्या नावांनी अकाउंट्स उघडतात, भन्नाटच काहीतरी नावाने अकाउंट्स असतात. कोणीही कोणाला शिव्या देतं आपण बघायला गेलो तर प्रोफाईल लॉक असते. सगळं इतकं गलिच्छ आहे, कुठे चाललोय आपण? मला एखाद्याची मतं नाही पटत तर ठिक आहे. आपल्याला जन्मदात्या आई-वडिलांचं पटत नाही. नवरा बायकोची मतं पटत नाही, मग ती चर्चेत नाही घ्यायची, सोडून द्यायची.”