LokSabha Election 2024 | अस्पृश्यांना सर्टिफिकेट देण्याचा अधिकार तुम्हाला कोणी दिला?, सातपुतेंवरील वक्तव्यावरुन भाजपाचे आव्हाडांना प्रत्युत्तर

By azad desk On Mar 26, 2024

लोकसभा निवडणुकीच्या 2024 च्या (LokSabha Election 2024) तारखा जाहीर झाल्यानंतर भाजपने उमेदवारांची पाचवी यादी जाहीर करत मागासवर्गीय म्हणून सोलापूर येथून राम सातपुते (Ram Satpute) यांना तिकीट जाहीर केले. परिणामी सोलापूरमध्ये म्हणजेच प्रणिती शिंदें विरुद्ध राम सातपुते अशी लढत पाहायला मिळेल. दरम्यान मागायवर्गीयांच्या संघर्षाबद्दल जाणीव नसलेल्या व्यक्तीला सोलापुरातून उमेदवारी दिली असल्याचे सांगत जितेंद्र आव्हाड (Jitendra Awad) यांनी भाजपावर टीका केली होती. या टीकेवर आता भाजपाने प्रत्युत्तर दिले आहे.

महाराष्ट्र भाजप प्रदेश प्रवक्ते प्रदीप गावडे (Pradeep Gawde) यांनी आव्हाड यांची कानउघडणी करताना म्हटले की, जितेंद्र आव्हाड तुमच्या सारखे काही हिंदूविरोधी मानसिकतेचे लोक सोडले तर प्रत्येकालाच आपण ज्या घरात, ज्या धर्मात जन्माला आलो त्याचा अभिमान असतो. बाकी अस्पृश्यांना सर्टिफिकेट देण्याचा अधिकार तुम्हाला कोणी दिला? तुमची हाजी-हाजी केली, तुम्ही सांगितल्यावर दगडे फेकली, तुम्ही सांगाल त्याला शिव्या दिल्या तरच ते खरे दलित या तुमच्या सरंजामी मानसिकतेतून बाहेर या! स्वतःचे विचार मांडायला, स्वतःचे निर्णय घ्यायला दलित समर्थ आहेत.

काय म्हणाले होते जितेंद्र आव्हाड?
मागच्याच वर्षी एका विषयावरती मी भाषण करत असताना आमदार राम सातपुते ह्यांनी मध्येच उठून काही बोलायला सुरुवात केली. एक वाक्य माझ्या लक्षात आहे. की मी सनातन हिंदू मागासवर्गीय असल्याचा मला अभिमान आहे. बाकी जे काही भाषण त्याचं झालं होतं ते मी इथे लिहित नाही. पण, ह्या तरुणाची अस्पृश्यतेविषयी व त्यांनी केलेल्या संघर्षाविषयी कोणतीही माहिती नसल्याचे दिसून आले, असे जितेंद्र आव्हाड म्हणाले.

पुढे त्यांनी म्हटले की, दुर्दैव आहे की ह्या तरुणाला सोलापूर मधून मागासवर्गीय म्हणून तिकीट देण्यात आले आहे. अस्पृश आणि त्याचा संघर्ष माहिती नसलेला उमेदवार देणं हा तमाम अस्पृश्याच्या अस्मितेचा अपमान आहे. सदरचे उमेदवार हे बीजेपेने सोलापूर लोकसभेसाठी (LokSabha Election 2024)दिलेले आहेत.