टाटा मोटर्सने मारुतीला मागे टाकले, सर्वात मौल्यवान ऑटो कंपनी बनली

By Shweta Chidmalwad On Jan 31, 2024

Most Valued Auto Company: टाटा मोटर्सने मंगळवारी शेअर बाजारात नवा विक्रम केला. कंपनीच्या समभागांनी 5 टक्क्यांनी झेप घेतली आणि उच्चांक गाठला. यामुळे टाटा मोटर्सचे मार्केट कॅप देशातील सर्वात मोठी ऑटोमोबाईल कंपनी मारुती सुझुकीपेक्षा जास्त झाले आहे. टाटा मोटर्सच्या समभागांनी एका महिन्यात 10 टक्क्यांहून अधिक उसळी घेतली आहे. JLR ची वाढलेली विक्री आणि प्रवासी वाहनांच्या किमती वाढल्याने कंपनीला फायदा झाला आहे.

टाटा मोटर्सने चालू आर्थिक वर्षाच्या तिसऱ्या तिमाहीचे निकाल अद्याप जाहीर केलेले नाहीत. तिसऱ्या तिमाहीत जग्वार लँड रोव्हर (जेएलआर) ची विक्री झपाट्याने वाढली आहे. याशिवाय, कंपनीने नवीन वर्षापासून आपल्या प्रवासी विभागातील वाहनांच्या किमतीही वाढवल्या आहेत. या दोन्ही निर्णयांमुळे गुंतवणूकदारांचा कंपनीवरील विश्वास वाढला आहे. जानेवारीच्या सुरुवातीपासून कंपनीचे शेअर्स तेजीत आहेत.

बीएसईच्या आकडेवारीनुसार, मंगळवारी टाटा मोटर्स आणि टाटा मोटर्स डीव्हीआरचे एकत्रित मार्केट कॅप 3.16 ट्रिलियन रुपयांवर पोहोचले आहे. यामध्ये टाटा मोटर्सचे मार्केट कॅप 2.87 लाख कोटी रुपये आणि टाटा मोटर्स डीव्हीआरचे मार्केट कॅप 29226 कोटी रुपये झाले आहे. या काळात मारुती सुझुकीचे मार्केट कॅप 3.15 लाख कोटी रुपये होते.

मंगळवारी ट्रेडिंगदरम्यान कंपनीच्या शेअर्समध्ये 5 टक्क्यांनी वाढ झाली. त्यांची किंमत 30 जानेवारीला 885.95 रुपये झाली. कंपनीचे तिमाही निकाल 2 फेब्रुवारी रोजी येणार आहेत. कंपनीने म्हटले आहे की 1 फेब्रुवारी 2024 पासून ते आपल्या प्रवासी वाहनांच्या किमती 0.7 टक्क्यांनी वाढवणार आहेत. कंपनीच्या JLR विभागाने तिसऱ्या तिमाहीत वार्षिक आधारावर 27 टक्के वाढीसह 1.01 लाख वाहनांची विक्री केली आहे. हा आकडा गेल्या 11 तिमाहीतील सर्वाधिक आहे. ब्रोकरेज कंपन्यांनीही कंपनीच्या शेअरला सकारात्मक रेटिंग दिले आहे.